遊戲機你唔一定有,但智能電話相信幾乎個個人都有一部,所以近年任天堂都積極推出咗唔少手機遊戲,當中包括《Super Mario Run》等遊戲。而今日任天堂宣布將與日本通訊軟體LINE合作,喺手機平台推出經典遊戲《Dr. Mario World》,並支援iOS及Android平台。
今日任天堂透過新聞稿宣布,將與日本通訊軟體LINE合作推行全新手機遊戲,而第一款推出嘅遊戲就係《Dr. Mario World》。而新聞稿內容指出,《Dr. Mario World》預計於2019年夏天推出,發行地區包含日本與美國等60個國家。
任天堂經典遊戲《Dr. Mario》最早於1990年嘅紅白機及街機上推出,並支援多人遊戲系統,而喺2009年任天堂再度於NDS主機上推出《Dr. Mario Express》就無再支援多人系統。今次任天堂與LINE合作推出嘅《Dr. Mario World》打住「World」旗號,相信連線對戰模式有望回歸。