20年來首發盈警 Apple股價跳樓式跌近1成

kingkong10002

      
            

大家無睇錯，Apple噚晚的確跳樓式裂口低開8%，事關Apple近20年來首次發出盈利預警。無他嘅，喺中美貿易摩擦中Apple成為咗磨心，而且iPhone售價同港鐵一樣有加無減，難怪分析師都將Apple目標價由210美元調低至160美元。
上一次筆者用上「蘋果已死？」做標題已經係去年8月，當時嘅Apple如日中天，股價突破207美元大關成為全球首間市值突破1萬億美元嘅上市公司。雖然係咁，但當時筆者提到Apple高度依賴中國市場，令Apple存在隱憂。
Bernstein高級技術研究分析師Toni Sacconaghi指出，Apple正失去智能手機市場佔有率，主要係因為產品價錢太貴，令消費者無足夠說服力去換新iPhone。加上Apple CEO亦承認「電池更換優惠」打亂咗舊iPhone更新周期，令iPhone需求較預期弱。
的確現時整個智能手機市場都似乎走向樽頸位，一向以創新見稱嘅Apple近年都無咩令人眼前一亮嘅產品出現，Tim Cook只係將教主Steve Jobs留下創意逐漸消磨。而大家見到Apple進步得最多嘅就係iPhone售價，iPhone由以往6千幾蚊一部賣到今時今日嘅過萬蚊，如果你部電話好地地，正常都會去換舊新電再戰兩年啦。