迷到男星的「小偷」 Sarah Snyder

lowerpoly

     

細個偷針，大個偷金，呢句嘢大家應該都聽啲老人家告誡你千祈唔好行差踏錯，一錯就只會錯落去然後身敗名裂，但只要你本身夠出眾，就算(疑似)偷咗個十幾萬嘅名牌手袋，都一樣可以縱橫上流社會嘅！
好似呢位Sarah Snyder咁，本身係一名網紅，以性感自拍而受注意，但真正「大紅大紫」就要講到2015年時佢被人指證佢於紐約偷咗個價值15999美金嘅Hermes手袋，不僅被警察上門拘捕，更被鎖入俗稱「臭格」嘅羈留室，後來經審訊發現案發佢身在美國另一端嘅佛羅里達州，最終沉冤得雪。其實只要睇睇佢喺IG發佈嘅相，就知佢屋企其實都幾有錢，區區十令萬一個袋又應該真係唔使偷，最重要嘅係當時佢男朋友係著名荷里活影星Will Smith個仔Jaden Smith，有咩叫男朋友買咪得囉使咩偷啫真係！
你以為佢同Jaden Smith一齊已經夠把炮？咁你就錯啦，佢同Jaden Smith 分手之後，上年11月就被拍到同出名鍾意溝o靚妹嘅Leonardo DiCaprio撐檯腳——喺呢度容許我提一提你，Sarah當日只有21歲，43歲嘅Leonardo歲數啱啱係佢一倍！叻女呢？ 實在佢又真係幾叻女架，雖然身高只有165cm，以外國女模特兒黎講絕對稱得上係「嬌小」，但Sarah依然憑住自己獨特(奇怪)嘅穿衣品味，深得年輕人喜愛嘅炫耀風格，再加上久唔久一張半張性感自拍而成為擁有過百萬Fans嘅網紅，仲成功行上D&G嘅T台、與Calvin Klein、Hugo Boss等品牌合作。再回望Hermes嗰十令萬個袋，小兒科啦。