【地震好得意？】傅嘉莉失言被轟 刪片換黑白相道歉

rockypin

圖︰傅嘉莉於ig直擊地震情況，見地震新聞畫面在震，覺得「好得意」、「好搞笑」，被網民狂轟，要急刪影片及道歉。

日本關西地區日前發生6.1級地震，最少3人死亡，逾300人受傷。傅嘉莉與阮小儀、金剛及衛志豪正於大阪附近嘅姬路拍攝TVB節目《街坊廚神》，小儀好快於網上報平安，仲話有啲恐怖；點知傅嘉莉喺ig直擊情況時，竟然用「好得意」、「好搞笑」形容地震新聞畫面，被網民狂轟，要即刻刪片改Po黑白相道歉。

網民怒斥無同情心

傅嘉莉在ig story上載多段影片，當拍到正在播放的地震新聞時，電視機在搖晃，傅嘉莉竟然話﹕「好得意呀，啲新聞，個畫面喺度震㗎，好搞笑，我哋頭先應該係feel到……」唔少網民怒斥傅嘉莉無同情心，又話佢「30幾歲人(講嘢)唔用腦」。

傅嘉莉︰「係我唔識表達」

見到網民嘅怒火留言，傅嘉莉急急刪片，仲改Po黑白相，於留言寫道︰「對唔住！引嚟咁大的誤會，係我唔識表達，唔夠智慧，無危機意識。之後再睇新聞知道有傷亡，先意識到這是一場很嚴重的天災… 天佑大阪」。

而有粉絲亦出面為傅嘉莉「還擊」︰「講緊個畫面啫 洗唔洗話人無咩 痴咩呀」、「一兩句說話就說她沒同理心？」、「已表示歉意已足夠，無心之失言，你要窮追猛打何必呀！咁你又代表甚麼來力踏她呢！你也是凡人！」

《街坊廚神》監製黃中濠在接受傳媒訪問時表示，看到地震報道後亦有致電導演了解佢哋喺日本嘅情況，因導演話只係感受到微震，所以節目會如常拍攝。