C朗要不到的她 Rhian Sugden

lowerpoly

皇馬球星C朗踢波又勁、人又靚仔又有錢、相信係唔少女仔(及男仔)夢寐以求嘅另一半，如果有一日佢喺Instagram上傳訊息畀你，你就算唔受溝都應該唔會狠狠拒絕。但根據英國《太陽報》嘅報導，有一位英國美女多年來一直拒絕C朗嘅熱烈追求，最後更出動到未婚夫「禮貌地警告」C朗先乖乖收手！
呢位美女就係性感內衣模特兒Rhian Sugden。據報Rhian係喺C朗於英國效力曼聯期間，由於經常於酒吧、夜店碰面而與其認識，後來C朗於2009年轉會皇馬，就改為不停於社交媒體上以訊息「轟炸」Rhian，除咗叫女方Facebook打畀佢同要求佢提供私人電話之外，更加問女方「幾時想生仔」。如果Rhian係一般女仔，大概會用即刻除哂衫用棉胎包住自己再速遞去西班牙接受C朗「濃濃的愛」，可惜佢唔係——準確啲黎講，佢係個有男朋友而且好忠心嘅女仔。
Rhian嘅男友係英國演員Oliver Mellor，二人自2013年開始一齊。雖然時間上係認識C朗在先，但Rhian對Oliver相當忠心，據報佢仲多次向C朗明示暗示自己有男朋友，甚至講到明「我唔覺得我男友會准我在晚上11時跟你說話」，可惜C朗保持佢喺球場上一貫嘅堅毅，完全冇退下嘅意思。最後要Oliver出動Send咗個「禮貌的」訊息叫C朗收手，C朗先冇再同Rhian聯絡。
件事有幾個睇法嘅，首先我哋當然要讚揚Rhian對男友嘅愛，「花生友」們亦可以暗地裏嘲笑C朗食咗好大碗閉門羹，但作為一個男人，我給予C朗更多嘅係同情——你睇Rhian啲相，你有機會你都會咁做啦！