《黑暗》中的最大亮點 Lily James

lowerpoly

呢個新年電影檔期真可謂好戲連場，你想激勵人心嘅有《大娛樂家》、你想爽快大笑嘅有《逃出魔幻紀》、你想感動流淚嘅又有《玩轉極樂園》，但如果你想欣賞精湛演技、精細劇本嘅話就一定要睇《黑暗對峙》(Darkest Hour)。首先Gary Oldman(即係路蘭版《蝙蝠俠》入面嘅戈登探長)飾演二戰時走馬上任嘅英國總理邱吉爾，造型維肖維妙之外，完全模仿其含糊不清嘅說話方法亦令人敬佩，加上成功表現出邱吉爾變化不定嘅情緒以及面對「求戰/求和」嘅矛盾心情，難怪有人話佢係黎緊奧斯卡男主角嘅有力競爭者。其次，電影入面都仲有一大「亮點」，就係飾演邱吉爾秘書Layton小姐嘅Lily James！
於《Baby Driver》中飾演Debora
Lily今年28歲，出道初期曾參演英國著名劇集《唐頓莊園》，成名作係2015年迪士尼真人版《仙履奇緣》，最近嘅作品就係《Darkest Hour》，以及上年大受好評嘅「歌舞飛車片」《Baby Driver》(飾演Baby嘅服務生女友)。喺《Darkest Hour》中佢飾演邱吉爾秘書Elizabeth Layton，跟隨邱吉爾接任首相、準備二戰、以及策劃「鄧寇克大逃亡」，而佢嘅主要職責就係為首相以打字機準備各類信件及演詞。邱吉爾本身文學根底深厚，演說亦情緒豐富，而Layton就係見證佢於壓力下寫下一篇又一篇著夠演說嘅見證人。
除此之外，本身係靚女嘅Lily James亦為呢套以男人為主嘅電影添上一點嫣紅，可以話係緊張氣氛下對觀眾嘅調劑。有好演技、好劇本、仲有靚女，《Darkest Hour》真係不容錯過架！