「Cos Colle高校」文化祭 超可愛女學生招呼你

kingkong10002

有睇過動漫都知，日本學校嘅文化祭對學生黎講，不嬲係集青春、熱血、純愛、友情、玩樂於一身嘅重要日子。對於學校連開放日都未必有嘅香港學生們，真係得個「恨」字。不過東京即將就有一個大家都可以去嘅「文化祭」，而且仲講到明有9位靚女學生同你見面！而呢間學校，叫做「Cos Colle高校」！
一睇個名就知呢間高校唔係真實存在啦！「Cos Colle」其實係指「Cosplay Collection」，乃係日本一個相當有規模嘅Cosplay活動搞手，而今次嘅「Cos Colle女子高校文化祭」其實就係佢哋黎緊11月3日搞嘅一埸活動，只係以文化祭做包裝。不過喺設定上佢哋都好有心機，九位Cosplayer都會根據自己嘅特色而「代表」唔同「學會」，舉行嘅活動亦會因為「學會」而改變。就算你完全唔明都冇問題，因為呢九位Cosplayer全部都係靚女黎呀！
個人最推薦兩位福岡轉校生「うらまる」同「百莉」，以及書道部嘅「夢咲はゆ」！
うらまる
百莉
夢咲はゆ
如果你都想親身感受一下日本文化祭加靚女Cosplayer嘅魅力，就可以於11月3日去到位於大田區(讀音為Ota-ku，同御宅族(Otaku)讀音一樣)嘅「ユザワヤ蒲田11号館 5F＆6F」！入場費2000Yen(約140HKD)！