日本女女小秘密 十大 [不想被喜歡的人看見的東西]

kingkong10002

雖然大家成日都講笑咁講︰「女神唔會去廁所」，但事實上我哋都明白，即使表面上更光鮮亮麗都好，女生都不過是個人，多少都會有不完美嘅一面，唔希望畀其他人見到，特別係喺自己鍾意嘅人面前。於是日本電視節目《ランク王国》就訪問咗300位涉谷及原宿街頭嘅時尚女女，睇下大家「不想被喜歡的人看見的東西」Top10係啲乜。
10.　筆記 其實好多女女都會喺筆記上紀錄個人生理期、鍾意嘅人嘅事情、當日心情等等，私密程度如同日記。
9.　沉迷偶像時嘅自己 好多女生只要遇到自己喜歡嘅事物或偶像時，都會失去冷靜同理智，彷彿陷入一種瘋狂狀態，咁失禮嘅自己，相信好多女生都唔願意被喜歡嘅人見到。
8.　化妝時嘅自己 女生多少會避免喺喜歡嘅人面前化妝，因為呢個係由不完美變成完美嘅過程，而且化妝過程間，可能會露出拉人中等等怪表情。
7.　手袋 有時候女女會喺手袋裡面放藥油、鼻毛夾等等有失形象嘅小物，唔希望畀其他人知道，特別係喜歡嘅對象，所以都會避免畀喜歡嘅人見到自己手袋入面放咗咩嘢。
6.　瞓覺時嘅表情 因為瞓覺時係「無法掌控嘅狀態」，所以好多女生都會感到非常不安，怕自己瞓覺時打開個嘴、打鼻鼾等等。
5.　以前嘅相片 好多女女細個都唔太識打扮，到大個先愈變愈靚，所以佢哋都好驚畀喜歡嘅人見到自己以前嘅衰樣。
4.　素顏 唔係每個女生都天生麗質，不施脂粉都可以漂漂亮亮，面對鍾意嘅人，當然想將最美嘅一面展示畀佢睇。
3.　短訊內容 每個人都會有自己嘅隱私，除非非常信任對方，否則都唔希望畀人見到自己同朋友嘅對話內容。
2.　手機相片 女生嘅手機裡除咗有美照，都有唔少醜照，又點可以隨便畀喜歡嘅人見到呢？
1.　房間 房間可以睇出一個人嘅個性係點，喺喜歡嘅人面前，當然唔想展露自己馬虎邋遢嘅一面，所以如果喜歡嘅人要參觀自己嘅房，大整理絕對係必需嘅！