三星展示Galaxy Note9水碳冷卻系統 滿足大家好奇心 ...

kingkong10002

                         
            

            

三星新推出嘅Galaxy Note9即將喺8月31日正式發售，今次除咗有全新設計嘅S Pen之外，仲加入咗全新嘅「水碳冷卻系統」。電腦有水冷就聽得多，究竟放入電話裡面又Work唔Work呢？今次三星喺網頁上解構呢個系統嘅秘密，一齊睇吓個水冷系統係咪只係Gimmick！
根據三星喺網站嘅描述，所謂「魚與熊掌不可兼得」，要整一部電量(4000mAh)可以持續一日，又可以流暢打機(2.7 GHz CPU)嘅智能電話，點都要付出代價一「過熱」。喺過熱嘅影響之下，會導致手機內嘅CPU變慢，打機嘅時候就會變得唔流暢，所以要解決呢個問題就需要一個「水冷系統」。
其實「水冷系統」並唔係新鮮嘢，三星早喺2016年推出Galaxy S7嘅時候已經引入咗「水冷系統」，佢利用裝滿水嘅多孔散熱器吸收手機嘅「熱能」，再將「熱能」轉化為蒸汽並透過管道帶走，當蒸汽冷卻後就會變返造水。
喺Galaxy Note9引入嘅「水碳冷卻系統」就係建基於Galaxy S7嘅「水冷系統」而改善出嚟，原來嘅「水冷系統」喺散熱方面缺乏效率，所以三星由結構上著手。新設計喺「水碳冷卻系統」嘅兩個熱界面材料(Thermal Interface Materials, TIM)中加入咗一層銅片，令到整個散熱系統可以傳遞更多熱能，從而提升散熱效率。此外，「水碳冷卻系統」仲採用咗更闊嘅散熱管道，體積達350mm3。