圖︰《延禧攻略》8月26日大結局,魏瓔珞終於做到皇貴妃,可以放心同乾隆打情罵俏。
《延禧攻略》8月26日大結局,睇到魏瓔珞終於做到皇貴妃,同乾隆打情罵俏,的確好sweet、好滿足!以為一切都完了吧?但原來劇中仍有5大疑團未破解!
一、純妃首先係純妃嘅死因,劇情初段,純妃都係一個與世無爭、不問官中事的賢妃;但後來佢「黑化」得好徹底,更係殺皇后兒子,同間接搞死皇后嘅「幕後黑手」!有追看劇集嘅Fans都知,純妃最後嘅下場係被打入冷宮,但佢後來係點死嘅呢?有指佢係畀人用風箏線勒死,連畫面都拍埋,但由於太血腥,所以冇播到出嚟。
二、爾晴有唔少網民懷疑爾晴囝囝嘅爸爸係乾隆,不過亦有網民覺得係另有其人!認為爾晴個囝係傅恒弟弟傅謙同佢生嘅。網民推測,爾晴同傅謙私通之後有孕,因為怕老公傅恒知道後會殺人滅口,所以就話BB係乾隆嘅,咁傅恒睇怕都唔敢殺皇上啦,如果屬實,爾晴呢招真係好絕!
三、高貴妃、魏瓔寧此劇的製作人于正,之前有於微博分享多張魏瓔寧同高貴妃嘅相片,更寫道︰「劇透一下:魏瓔寧死亡之謎」,令唔少劇迷揣測,高貴妃與魏瓔寧之死有關,仲諗住大結局會揭開謎底;點知等了又等,到全劇播完都搵唔到答案。有網友推測,魏瓔寧因繡功好而深得高貴妃喜愛,而高貴妃在得知魏瓔寧被污辱後,試圖為她討回公道,無奈裕太妃地位太高,令佢只能眼白白睇住魏瓔寧被害死。
四、裕太妃至於裕太妃嘅死,亦係充滿疑團。劇情話裕太妃係畀雷劈死嘅,而瓔珞仲有份促成呢件事發生,雖然話瓔珞霸氣啫,但要用雷劈死人,真係要「雷神」先搞得掂吧!原來瓔珞喺紗帳做手腳,請繡坊嘅張嬤嬤將紗帳嘅絲線換成金屬線,由於金屬線易導電,就做到令裕太妃被雷劈死嘅結果喇!
五、袁春望袁春望原本係魏瓔珞嘅義兄,點知最後成為劇中「big boss」,仲被魏瓔珞揭發係先帝(雍正)嘅囝,話係雍正當年於太行山被匪徒追殺,藏身於農家時,與一名農家女子所生的私生子;太后矢口否認,仲話袁春望只係土匪之子,令袁春望聽後當場發瘋!乾隆諗住即刻處死袁春望,點知太后為佢求情,令網友猜測袁春望真係先皇之子呀!
其實《延禧攻略》劇情有咁多疑點,可能係同此劇由94集刪至得70集有關,究竟呢24集講咗啲咩?有指,部分刪減嘅劇情係同瓔珞所生嘅兩位格格有關,但確實刪咗啲咩,至今都係一個迷。唔知劇組有冇打算搵機會分享被刪嘅劇情呢?
圖︰製作人于正之前在網上分享過幾張高貴妃同魏瓔寧嘅合照,究竟佢哋係咩關係呢?