|
有唔少女星由出道到走紅樣貌都經歷幾番蛻變，顏值愈變愈高，分分鐘由豬扒變女神！今次大家就嚟睇吓有邊啲女星識得神奇大變身，一齊變變變！
女星愈變愈靚楊怡 變鬼婆鼻
楊怡出道時面圓鼻扁節翼闊，近年鼻頭變得愈來愈長，初初睇落似木偶，依家睇落整個鼻變得愈尖愈高，成個鬼婆鼻咁！對此楊怡否認：「我覺得整容冇所謂，但接受唔到要開刀整，太危險！」
楊怡個鼻變得又尖又高，向住荷李活女神安祖蓮娜祖莉方向進化。
Angelababy接受整形鑑定
Angelababy由入行至今，多年來都飽受整容傳聞嘅困擾，2015年佢喺北京接受整形鑑定，喺內地傳媒同公證員見證下，接受對面部嘅全面檢查及鑑定，證實額頭、下巴、雙眼皮、鼻樑、口腔以及嘴唇等地方冇做過手術。令困擾Baby多年嘅整容傳聞終於劃上句號！
Angelababy嘅標緻臉孔瘋魔萬千粉絲，雖然網民翻睇舊相覺得Baby以前同依家個樣的確係有啲分別，但既然檢查報告已出，可能只係箍牙嘅效果太厲害，又或者真係女大十八變！
徐子珊 跳舞變臉
子珊初出道樣貌及身形都脹卜卜，但走紅後為求耳目一新，四出打聽變靚良方，成功變走baby fat及面形尖晒。問到點解面尖晒連輪廓都唔同，子珊賴跳舞變臉：「我做運動囉，每星期跳三堂舞，每堂跳幾個鐘。」
徐子珊話自己面形變尖變靚係靠每星期跳三堂舞，每堂跳幾個鐘。
吳雨霏 變間尺鼻
吳雨霏早前於訪問表示，初出道時被形容為於Cookies中最不起眼，但近年豬膽鼻離奇消失，變得高直，問到有否整容，Kary回應︰「以前不斷寫我個樣，真的想過整容。不過做人應該要有自信，所以後來無整。」
吳雨霏豬膽鼻離奇變得高直，佢話以前曾經諗過整容，但最終冇整到。
林志玲 蠟像美人
林志玲愈老反而樣子睇落愈年青，而且容貌變化比出道時相差得多，鼻樑更高更拱、鼻頭更尖細，眼眶擴大眼袋消失，高顴變平，V面更尖小，而且咪咪亦變大，惟美人面容硬軚，表情不多，只能展露機械式笑容，笑時眼角、嘴角被硬繃繃扯高，不露半條笑紋、眼紋、皺紋，蠟像美人完美有餘卻欠活色生香。對於愈變愈明顯，志玲氣定神閒解釋︰「每次都有人這樣說，只不過做完運動面容光亮了。」又說歡迎大家摸臉驗證。
被指愈變愈靚，林志玲解釋話：「只不過做完運動面容光亮了。」
傅穎 硬膠樣
餅碎傅穎比出道時鼻樑變得又高又直，面形明顯比之前尖長，幾乎認唔出佢。問佢點睇俾人話變臉，佢淡定說：「因為大家耐冇見我，你哋冇見過我冇化妝嘅樣啫！所謂人前特美，人後是鬼。(怕唔怕俾人話你整容？)冇所謂，都講咗十年有多。」說時表情繃緊，笑容亦好生硬，佢仲事先張揚話老咗唔介意打針除皺紋！
傅穎話自己變臉係靠化妝，但亦唔介意打針除皺紋。
吳若希 賴化妝
被網友指「Pizza面」消失，而且鼻樑出事，更質疑打Botox，吳若希例牌否認整容，解釋係化妝技巧出錯惹誤會：「個妝濃咗，鼻影掃深色咗，望落去可能高啲。」
吳若希話「Pizza面」消失只係因為個妝化得濃咗。
熊黛林 任講唔嬲
未紅時四方面、身形平平，走紅後變成V面及迫爆身形，而惹來整容傳聞，對此熊黛林說：「我唔會認真去睇呢啲新聞，報告印咗出嚟，只會令人有更多嘢講。」
熊黛林話唔會認真去睇自己被指整容嘅新聞。
周汶錡 扯火否認
由初入行扁鼻變高鼻，pizza面變瓜子面，輪廓近年愈變愈索，周汶錡對自己百變面容曾以「女大十八變」解話，可是五官多次惹來整容傳聞，一再被人揭瘡疤嘅周汶錡，由最初淡淡定回應，扯火說：「你話我有冇疤？有定冇？你講呀！」
對於自己愈變愈靚嘅面容，周汶錡話係「女大十八變」。
何佩瑜 擺明是假
受整容傳聞困擾嘅何佩瑜(Jeana)， 曾反手「發誓」 冇整容後，但事後又承認割雙眼皮和啪針瘦面，一於做埋整容代言人，實行賺到盡！由疑似假胸到擺明假波，當然要衝破不少心理關口，Jeana大方說：「講真我隆之前都已經俾人話，不如索性豁出去。我覺得自己嘅線條可以再完美啲，身材有爆炸性啲，隆大一cup係要全世界啲男男女女都望住我，想佢哋一手都揸唔晒！做得呢行都係想多啲人留意，我覺得自己做到。」
Jeana大方承認曾割雙眼皮、啪針瘦面和隆胸。 | 
发表于 2018-4-1 23:31:00
