有人嬲佢露乳溝 性感高球手接死亡恐嚇

lowerpoly

上星期有F1賽會宣佈因為「不合時宜」而廢除賽車女郎傳統，以後賽車場上「香車配美人」嘅畫面成為絕響。事後有賽車女郎指女權份子令其失去工作引起廣泛討論，不過其實過去幾年黎都有一位性感女士喺一個靜好多嘅比賽場上爭取性感打扮嘅權利，甚至因此獲得死亡恐嚇。
講緊嘅就係前職業高爾夫球手Paige Spiranac。Paige喺高球場上嘅表現雖然稱唔上出色(職業排名於1000名以外)，但就因為其亮麗外表、性感嘅裝扮而成為Fans們的寵兒，喺Instagram上有超過120萬Followers，更因為其名氣而受邀參加2015及2016社拜沙漠精英賽，今年更當上首位女性開球嘉賓。事後當然有人指責佢一切成績都係「露乳溝而來」，佢接受英國《衛報》訪問時更指因為其性感打扮(及名氣)，有人於當年比賽期間搔擾佢及家人，又有人勒索佢，甚至作出死亡恐嚇。至於原因，她估計「因為我與一般的球手不同？我著得不同，我不符合高爾夫球應有的樣子。」
而咩為之「高爾夫球應有的樣子」？根據上年夏天美國女子職業高爾夫協會定下嘅新規則，女子球手要「展示她們的專業打扮，帶出球賽正面的形象」，講白啲就即係「避免跌下的領口」以及「禁止任何短裙或者短褲」。而對此Paige就相當不滿意，佢於《衛報》訪問中話「我喜愛高爾夫球，但我覺得很多東西需要改變…球賽要進步，也要變得更加廣泛」。換言之，佢認為由打扮入手令球場看點更多就係一種改變。
連「全民高爾夫」都玩唔好嘅我哋當然就冇資格去評論「高爾夫球應有的樣子」究竟係咩，但作為一個正常人我哋又不禁要問：點解一個女仔要因為其衣著而被恐嚇呢？又點解一個女仔要因為其衣著而失去工作呢？究竟我哋係活於一個開放自由嘅世界，定係一個保守封閉嘅困局呢？