真.無線世代 四款注目無線藍牙耳機

kingkong10002

2018年嘅科技大趨勢之一，可能係「無線」，講緊唔係仲誇緊細袋果間大台，而係耳機方面嘅真.無線，貼地啲嘅講法即係「兩粒嘢冇條線果種藍牙耳機」。最近唔少廠商都紛紛推出真無線藍牙耳機，一齊睇睇四款注目新耳機。
1) Jabra Elite 65t / Elite Active 65t Elite系列第三代真.無線耳機，承接系列特色，內置收音咪，可以保持通話，亦方便使用語音控制。運動版Elite Active 65t更支援IP56防水防汗，以及整合速度計追蹤功能，幫助提升訓練效率。兩款耳機每次充電可連續播放5小時音樂，收納盒亦可額外充多兩次電，夠晒長氣。 Elite 65t：$1,329（2月上市） Elite Active 65t：售價待定（4月上市）
2) Bose SoundSupport Free 用藍牙耳機最驚連接不穩定，聽聽吓歌都會斷線；Bose SoundSupport Free則號稱配備全新訊號系統，耳機同手機或平板相距9米都可以連接都得。耳機採用專利的StayHear+運動耳塞，支援IPX4防水防汗，亦可以連續播放5小時音樂，右邊耳機另設語音控制按鈕，做運動更方便。 售價：$2,098（2月7日發售）
3) Sony WF-SP700N 有人追求優質隔音，但可能有啲情況下戴住耳機嘅同時都仍要對周圍環境聲音保持警覺，例如係跑街嘅時候；Sony WF-SP700N就支援數碼降噪同環境音效模式，後者會例用耳機兩側嘅收音咪，等用家聽緊歌嘅同時都可以聽到隔離講乜。耳機同樣具備IPX4防水防汗功能，不過續航力就較以上兩款稍遜，只得3小時。 售價：待定（2018年初上市）
4) MARS by NAVER and LINE 以上三款耳機均出自大家較熟悉嘅耳機品牌，但今屆嘅CES美國消費電子展上，LINE破天荒同母公司NAVER聯手，研發出一款AI智能無線耳機「MARS」。MARS外型的骰，但就有特別嘅翻譯功能，兩個人一人戴一邊耳機，就可以倚靠人工智能Clova即時翻譯，支援十種語言，包括韓文、英文、日文、中文（繁簡）、西班牙文、法文、越南文、泰文及印尼文。MARS預計2018年初於韓國上市，到時有方法同韓妹「溝」通啦！ 售價：待定（2018年初上市）