手機PIN碼真係安全？研究指黑客撞3次即可破解

kingkong10002

當新一代嘅智能手機已經進化到用緊瞳孔以至臉容解鎖時，可能有部分用戶會選擇用返PIN密碼，認為比較可靠。但新加坡一項學術研究就話：黑客只要掌握到手機內六項感應器嘅數據，就可以喺3次內破解4位數字嘅PIN碼。
新加坡南洋理工大學發表報告指，研究人員建立了一條演算式，只要收集手機上加速計、陀螺儀、磁力計、距離感應器、氣壓計及光線感應器六項感應器的數據，計算手機傾斜嘅角度，同埋手指阻擋嘅光線，就可以破解用戶四位數字PIN碼。據指，研究人員用多部Android手機安裝過呢條演算式做實驗，準確率高達99.5%。
負責研究嘅教授Dr. Shivam Bhasin解釋，當用戶按1、5同9時，手機傾斜嘅角度都會唔同；而按1字時，手指亦會比按9字擋住更多光線。不過事實上演算法只係收集了三個人的數據，每人隨機輸入了70組四位數字PIN碼去建立演算式。雖然如此，目前演算式已可計算出10,000個PIN碼組合，而用戶數據愈多，準確度就愈高。要獲得手機感應器資料並唔難，唔少App都可以做到，睇嚟手機廠商要認真對待呢個保安漏洞。