中學生回憶 《鄰家女優》女主角Elisha Cuthbert

lowerpoly

聖誕流流，有人約嘅就去咗街，冇節目如我嘅就留喺屋企睇下戲消磨日神。誰知喺屋企搵下搵下，竟然搵返喺中學時期「浪費」咗我無數時間、體力同紙巾嘅電影《鄰家女優(The Girl Next Door)》出黎。睇返當年嘅女神Elisha Cuthbert真係正到冇朋友，然後又令我諗起，又靚又有身材嘅佢呢十幾年黎究竟去咗邊呢？
喺出演《鄰家女優》之前，Elisha最出名嘅演出係於電視劇《24》中飾演Kiefer Sutherland嘅女兒Kim。你或者會以為因為《24》爆紅，連帶Elisha人氣都會急升。可惜因為角色設定同劇本問題，一直拖後腳嘅Kim由第一季開始就被觀眾嫌棄，去到2016年都仲被《Entertainment Weekly》評為「電視史上最煩厭角色」。所以喺三季之後就由主要角色變成久唔久出現嘅配角。
離開《24》之後，Elisha嘅下一部作品就係2004年上映嘅《鄰家女優》，當中Elisha飾演嘅係一名當紅女優，引退嘅後重返校園，因緣際會之下與住隔離屋嘅男主角戀上。性感老手遇上青春處男，雙方擦出火花水花，Elisha仲有火辣親密場面，對於一眾少男造成直達靈魂嘅衝擊！不過即使Elisha真真正正拋咗個身出黎，《鄰》嘅票房以及評價依然相當慘淡。亦令Elisha嘅演藝事業受到重創。
隨後Elisha先後出演《恐怖蠟像館》、《The Quiet》、《Captivity》，可惜唔係票房慘淡，就係評價其差，又或者兩樣都有。如是者Elisha就坐實「票房毒藥」之名。而佢亦坦言一直都冇法融入荷里活嘅環境，於是決定專心同當時嘅男朋友、依家嘅老公、加拿大冰上曲棍球選手Dion Phaneuf生活。接下來幾年Elisha主要集中於拍攝電視劇，可惜反應依然慘烈。
不過毒藥還毒藥，坊間一直都唔否認Elisha係個靚女。FHM、GQ、Maxim等美國雜誌多次將佢列入一年一度嘅「百大美女」榜之中，2008年各進佔FHM「最性感女人」第四位，2013年成為Maxim評選「電視上最漂亮的女人」。只係屈指一算，當年嘅性感少女已經35歲，中間呢十幾年黎如果際遇好啲，佢嘅成就一定會更高。
值得慶幸嘅係，Elisha於2016年起出演Netflix喜劇《The Ranch》表現出色，逐漸洗脫觀眾對佢一直嘅偏見。《The Ranch》係Netflix其中一個最受歡迎嘅喜劇系列，2016年首播之後反應不俗，於是繼續播到2018年。雖然只係一個「小陽春」，但我都衷心希望Elisha可以把握呢次機會，爭取更好嘅演出——如果可以性感我都唔介意架。