年初打賭約會「奇蹟男」冧掂加拿大美女網球手？

lowerpoly

喺講故仔之前，我決定放一埋相等大家知道邊個係Genie Bouchard先。
Genie Bouchard係一名加拿大女子網球手，係加國歷年黎第一位打入大滿貫單打決賽、兼第一位單打排名進入前十嘅選手，除此之外最重要嘅就係佢係一名甜美可愛嘅靚女，仲曾經係《Sport Illustrated》嘅 Swimsuit Model，真真正正又靚又叻。另外佢亦有一個愛好，就係睇美式足球。
今年二月美式足球決賽「超級碗」舉行到第三節時，Genie支持嘅亞特蘭大鷹隊以28-3領先新英倫愛國者，於是佢就喺Twitter上揚言指一早知道鷹隊會勝出。就喺呢個時候，一位名不經傳嘅大學生John Goehrke留言同Genie打賭，如果最後愛國者反勝，二人就要約會一晚。或者係太無聊、或者太有信心，Genie二話不說就答應。點知最後愛國者喺第四節就追到平手，進入加時賽仲贏埋。於是Genie就好有口齒咁同John去咗約會，最後John仲「賺」咗個Good Bye kiss，真係羨煞旁人呀！
正當大家都以為呢次只係一個漂亮嘅「關公Show」，Genie近日就係Twitter公開同John再次見面嘅照片，而且又一齊玩Snapchat Filter，又舒服地坐喺梳化上傾計，睇落關係非淺而且頗為曖昧。由於自從2月嘅約會之後，二人就冇公開見面，所以今次「公開關係」可謂震驚一眾花生友。而如果John真係因為一次打賭而成功抱得美人歸，咁就真係2017最大嘅奇蹟啦！
呢個故事教訓一眾毒男，呢個世界冇溝唔到嘅女，只有你唔敢溝嘅女！襯住呢個機會Tag埋你女神入黎，如果呢個Post有1000Like就叫佢同你去街街！