聖地牙哥嘅加利福尼亞大學一項研究發現：同一班人一齊影相，比自己一個單獨影相會顯得你更靚仔。研究人員就表示，呢種係一種「啦啦隊效應」，因為一次過睇太多臉孔，會顯得大家都差唔多，Level相對都較平均，咁樣無形中可以掩蓋你嘅缺點，不過佢就冇講如果全世界都靚仔得你一個樣衰，會唔會令你更低分喇。
法國有一項研究證明︰一個可以同BB好好相處、玩得好開心嘅男人，比起討厭小朋友嘅男人更容易得到囡囡電話號碼，機率仲係高出3倍咁多添！研究人員就話，背後邏輯係因為，當個男人可以同BB有良好互動，代表佢更願意對將來嘅孩子付出，從而更得女人心。
澳洲一項研究表示︰女人覺得有少少鬚（大約留10日嘅程度）嘅男人，比起留好多鬚或者剃鬚剃得好乾淨嘅男人更有魅力。因為適當份量嘅鬚可以顯得有男子氣概之餘又唔會太Over，反而以前有研究證實，顯得更Man嘅多鬚男人，會令女性認為無法維持長久關係。
根據一項法國研究︰當你帶住狗狗嘅時候，你可以得到囡囡電話嘅機會率比單丁一條佬高出3倍，研究人員就話，唔少女性都覺得養狗會顯得人善良、細心、敏感等等，呢啲都係女人喜歡嘅元素。
康乃爾大學研究表明︰女人對唔自私、鍾意做義工嘅人有更大嘅約會興趣。
新墨西哥大學嘅研究證實︰有幽默感嘅男人比無聊嘅男人可以得到更多短期而無責任嘅啪啪啪機會。研究人員認為，幽默感係智力同創造力嘅表現，所以女人認為有幽默感嘅男人會係更好嘅伴侶。
法國嘅研究表明︰當一個男人想問囡囡要電話號碼嘅同時觸碰佢嘅手臂，囡囡會更容易接受，不過呢個研究只適用於法國，如果巴打有機會媾法國妹，呢個Point就可以參考下，如果唔係就咪亂試。
| 
发表于 2017-11-23 20:07:28
