後空翻機械人大有來頭？佢嘅[兄弟] 都嚇人一驚

hotdog521

日前機械人Atlas打後空翻嘅片段喺網上廣傳，引起大眾熱議，喂呀機械人身手仲靈巧過真人呀，反啦反啦。點解Atlas咁勁揪？因為負責開發佢嘅機械科技公司Boston Dynamic都唔惹少，前主為Google Alphabet，後來又被軟銀收購；其他「製品」同樣令人咋舌。
Boston Dynamics於1992年成立為麻省理工嘅分支，專門研究各款行動自如嘅動力機械人，旗下嘅機械人以動態流暢、平衡優越，且結合尖端智能感知技術見稱。早於2005年已經發表巨型機械狗Big Dog。2013年，公司獲Google收購，成為母公司Alphabet旗下的「X」，作價不詳。此後Boston Dynamics都有發表不少令人眼前一亮嘅機械人，包括Atlas、機械狗SpotMini等等。
可惜嘅係，Boston Dynamics主要唔係靠銷售機械人維生，而係提供商用技術開發及顧問諮商服務，美國國防部、Sony aibo機械狗等等都曾經係佢哋客仔。據指Google認為佢哋無法短期內帶來實質收益，最後喺2017年將公司賣畀軟銀。數返Boston Dynamics嘅名作，唔少都相當傑出。
Big Dog Boston Dynamics第一隻BB，睇個名就知係「大狗」，高1米重109kg，四隻腳嘅關節有多個感應器，仲有立體視覺系統，時速有10公里，可以上斜35度，由陸軍資助開發去運送物資，最高負重有成150kg，而且不論係泥路、積雪定水都可以活動自如。
WildCat 2013年面世，睇落細細隻冇頭冇尾，但實質時速達32公里，打破咗麻省理工嘅舊紀錄。佢嘅前身叫Cheetah，實驗室紀錄時速更加達到48公里，快過保持飛人，號稱世界上最快嘅四腳「機械獸」。
Atlas 2013年首度發表嘅人形機械人，最新版本高1.5米重75kg，利用3D打印硬件，令佢身型更輕巧。佢全身有28個關節，以電動加液壓驅動，內置嘅平衡感應器同立體視覺令佢跌低都識起返身，遇到障礙物亦識自動避開，一般搬貨冇難度。
SportMini 全電動機械狗，上代曾經出現喺公司聖誕片扮聖誕鹿，被網民形容為「又驚嚇又好正」；最近11月發表咗黃色嘅新版本，外形冇咁驚嚇，有3D視覺系統，仲可以跑成90分鐘。不過佢有個兄弟Spot，背脊有隻機械臂，望落……都係好詭異囉。